अज्ञात रोगबाट हुम्लामा सातामै १४ को मृत्यु

नवराज महतारा, हुम्ला

हुम्ला ।  एक साता देखि फैलिएको रोगका कारण एकै घरका तीन जना सहित राया र स्याँडामा १४ जनाको ज्यान गएको छ । रोगले स्याँडा ५ भजने रोकायाका भाई रंगविरे रोकाया र भाइ बुहारी भ्याल्नी रोकायाको मृत्यु भएको छ । 

गएको साता देखि फैलिएको अज्ञात रोगका कारण स्याँडा ४ लामती बुढा, ६ भद्विर बुढा, ५ ढोली बुढा र ४ का धनराज बुढाको मृत्यु भएको स्याँडाका स्थानीय छक्क बुढाले जानकारी दिनुभयो । उहाँका अनुसार मृत्यु हुनेमा १९ देखि ७२ वर्ष सम्मका  छन् ।

यसैगरी अज्ञात रोगका कारण रायामा समेत ७ जनाको ज्यान गएको छ । गएको ७ गते देखि आजको दिन सम्म उक्त संख्यामा बिरामीको मृत्यु भएको रायाका स्थानीय वासिन्दा वलविर रावलले जानकारी दिनुभयो । उहाँका  अनुसार एक सातामै अचानक फैलिएको रोगले राया ६ का सिरे रावल र  उहाँकी श्रीमती लाटी रावलको मृत्यु  भएको छ ।

श्रीमती लाटीको वैशाख ८ गते मृत्यु भएको थियो भने सिरेको आज ( वैशाख १२) गते मृत्यु भयो । शुरुमा नाक, कान बुझीने, ज्वरो आउने र बिस्तारै खान मन नलाग्ने उक्त रोगले राया ८ का ५७ वर्षका जस रावल र निजकी ५२ वार्षिय श्रीमती चिनकली रावलको समेत मृत्यु भएको छ । ज्यान जानेमा राया ६ की ३५ वार्षिय विष्णु रावल, ७ की ७५ वर्षकी रिउली रावल, २ का ७७ वर्षिय सर्वजित रावलको मृत्यु भएको रायाका पूर्व गाविस अध्यक्ष प्रेमबहादुर बुढाले जानकारी दिनुभयो । 

औषधी नहुँदा थप समस्या 

गएको साता देखि अचानक फैलिएको अज्ञात रोगले पिडित बिरामीहरुका लागि स्थानीय स्वास्थ्य चौकीमा औषधी नभएकाले समस्या थप जटिल बन्दै गएको बताइएको छ । रायाका पूर्व गाविस अध्यक्ष प्रेम बुढाका अनुशार स्थानीय स्वास्थ्य चौकीमा औषधी नभएकाले पनि केही बिरामीको मृत्यु भएको हो ।

सामान्य बिसन्चो हुँदै बिरामी स्वास्थ्य संस्था जान्छन तर स्वास्थ्य संस्थामा भएकी अनमीले औषधी सकिएको भनेर रित्तोहात फर्काउने गरेकाले पनि बिरामीको अवस्था नाजुक हुँदै गएको बताउनुभयो । 

राया स्वास्थ्य चौकीकी अनमी बेलसरी बुढाका अनुसार स्वास्थ्य चौकीमा जिल्ला अस्पतालले पठाएको औषधी सकिएकाले स्वास्थ्य चौकीमा आएका बिरामीलाई उपचार गर्न नसकिएको स्वीकार गर्नुभयो ।  

चैत अन्तिम साता सम्म जिल्ला अस्पतालमै सामान्य औषधी समेत नभएको हुम्लाका स्थानीय स्पास्थ्य संस्थामा सिटामोल समेत नपाएर बिरामीको ज्यान गएको स्याँडाका  स्थानीय छक्क बुढाले नयाँपत्रिकालाई जानकारी दिनुभयो  ।

उहाँका अनुसार लामो समय देखि सँडा स्वास्थ्य चौकी यन्चार्ज बिहिन छ । स्याँडा स्वास्थ्य चौकीमा भएकी अनमी संगिता बुढाले आउने बिरामीलाई सिटामोल समेत छैन भनेर फर्काउने गरेकाले पनि बिरामीको ज्यान गएको आरोप स्थानीय वासिन्दाले लगाएका छन् ।

तर जिल्ला स्वास्थ्य कार्यालयले भने त्यसको अस्विकार गरेको छ । गएको सातादेखि फैलिएको रुघाखोकीले राया ५ र स्याँडामा ४ गरी ९ जनाको मात्रै ज्यान गएको जिल्ला स्वास्थ्य कार्यालयका सूचना अधिकारी नरेशवावु श्रेष्ठले जानकारी दिनुभयो ।

एकिकृत स्वास्थ्य शिविरका क्रममा कालिका रहेका सूचना अधिकारी श्रेष्ठले गएको चैतमा जिल्लाभरीमै औषधीको अभाव भएपनि हाल त्यो अवस्था नरेहको दावी गर्नुभयो ।

अज्ञात रोगले एक सातामे ९ जनाको ज्यान गएको खबरपश्चात आजै राया र स्याँडामा औषधी सहित स्वास्थ्यकर्मीको टोली खटाएको बताएका सूचना अधिकृत श्रेष्टले स्वास्थ्यकर्मीको रिर्पोटका आधारमा मात्रै कुन रोग हो भनेर एकिन हुने जानकारी दिनुभयो ।  रायामा अहेव कालीबहादुर शाहीको नेतृत्वमा र स्याँडामा अहेव हरिभक्त शाहीको नेतृत्वमा औषधी सहितको टोली परिचान गरिएको छ ।